Мусулмунен, кинет дусатъ орум

Нигугъет му ху въуз йи суг тамард лум

Аз нуми шароб-та лум йи пегум

Баъд лак даркар дъед мукати Хаййум

Тар маллаям нисц въузат Диловъар

Йута суг лувдат хъаб сат баробар

Въирд суг лувд аккуни судъч муяссар

Нуми суглувиченен въи навъкар

Въи суг шич въуз соз кати кинум сар

Помиранд йи нуми богбун вуд

Йид мевъа ви боганд арзун вуд

Ам мун йаманд вудат ам кайун вуд

Йу савзъа въи бог дарун пи зун вуд

Йу богбон хубатъ аз Хугнун вуд

Въм ангурдъчат въи нум дар чахун вуд

Богбун ху богчат бойтарин вуд

Ик дис кор навуд въирд йу кин вуд

Въи вухъат йемун тар въи ризин вуд

Въаманд фук вахтатъ хуш въам чабин вуд

Въам акуни нум Гулофарин вуд

Дъу пуцен въинд вад йивъ нум Ямин вуд

Въи хидирди пуц нум Аслиддин вуд

Йа ризин вад ху дод нозийун

Йа хушруйтарин вад ар Бадахшун

Въамвинтов ят савъдогари Авгун

Вамти ошик вуд шоири Хугнун

Цунд йошенанд вад йа вьев армун

Цунд пидьен вьадь ят богбунти мехмун

Вьам чордьед насут рози йу богбун

Йа даврайи аз Шамс сафар чуд

Аз Шамси ху пиц йа тар Камар чуд

Камари дуне зерат забар чуд

Аз ними инсуни гову хар чуд

Зиндагунийи аз бад бадар чуд

Йи метъата богбун редъч тока

Нафамум въи зиретен тарка

Дедъч ар ху богху чоста ху мевъа

Чостта йу ху мевъаянд въи бахра

Дундат богхезва йат йи савъора

Аз девъоланд ар бог дъоди калла

Йа хаб нав нагчид дусатъ сахар чуд

Йу савъораи йева гузар чуд

Ар боги тар богбун йу назар чуд

Аз въам ангурдъи богбун хабар чуд

Форси зивтийи ху гап сар чуд:

Ассалом богбун, кувъвъати кор

Омадам туро бинами як бор

Аз мевъаи ту шудам хабардор

Хохам ки надех ту худро озор

Вакти ту намегирам бисер

Чанд харфи маро дар гуши худ дор

Ман шунидам, ки ту дори ангур

Бо ангури худ гаштасти машхур

Аз ангури худ дори майи зур

Гар хохи, ки худ нашав кару кур

Ширинийи бахтат нашавад шур

Ангура бибур аз бог кун дур

Ин аст ба ту номаи инсон

Аз тавсияам нашав ту гиръен

Гар ангура намебури, богбон

Аз кирдори худ шави пушаймон

Мешави ту дар мулки Бадахшон

Кофартарини насли инсон

Аз въам ангурдъи богбун чу хабар

Нала ангурдъ йид аррангата захр

Ангурдъхъуцат шайтунен баробар

Ту дев ху зиретен зун махар

Ца живъчат ху бахтти мадъа биспар

Въам ангурдъ хъичанд аз бог ки въам дъар

Икдийи луд ху баъд нопадид сут

Ичайи нафамт йу тарчи чид сут

Богбун аввал пи остун чи тид сут

Як бор тар ху чой мулло чи вид сут

Въам ху ангурдъчат кариб чи мид сут

Богбун ба худ йатху дъоди нахра

Чизчат въуз ху ангурдъ дъам арра

Въузум дам недъд чудум дам гулла

Нала мунд му зирет йид му мувъа

Нала чидум доданд йаст захра

Чидум дод вардъед зинта ху бачча?

Баъди въи савора кати чуд кахр

Нала йу чай аз чидум кабар

Чай-та лувд ангурдъ аррангата захр

Чизчат ангурдъат шайтун баробар

Нала лаки сам аз дин въуз дъар

Нала мунд девенард нист бовар

Афсус, маш кадри дунье нафамам

Хъац бирезамат дарье нафамам

Сит нихъпарамат въи маъно нафамам

Аз въиндиям сиц педъо нафамам

Хурдам дисат ху хамро нафамам

Йакбори худъой лувдо нафамам

Тобистун нагъчид хавъо шито сут

Хац-пац фукатъ паст ар даре сут

Парранда маранда якчо сут

Арчизцачат баланд въев садо сут

Паркенен зирд саттат тирамо сут

Богбун ху мевъа чамчидо сут

Мевъадъивдтийен фукатъ кор чуд

Мевъайен зидунанд лапи зор чуд

Йи илавен гуе чой то бахор чуд

Кисипчеканден ангурдъ катор чуд

Аз ангурдъанден шароб тайер чуд

Богбуни чуд ху пацен насихат

Нала эй пацен чудам мехнат

Въуз тамард тамет мурд чуд хизмат

Мехнатам чуд, шич въинам рохат

Нурта йи ташкилиям ху бог чат

Въев ташкили вхд аррангата сур

Авъкотат шаробен чуд фукатъ чур

Паценен бирохът арцунд цавуд зур

Ризини начемт въамен чу мачбур

Йу доди бирохътху сут карат кур

Сар сут йеданд ам гебатат ам хъур

Бирохъти додат бирохъти зирет

Бирохътен ху баъд шароби въев ед

Осойахъи сут йеданд барбод

Хидирпуц андуйд паргусти ху дод

Йу зъулди андуйд дъоди ху вирод

Въам ризинен дъод йа дусга вид мод

Йкдийи фукатъ ангурдъ чу бунед

Йи пуц мут дъидат йивъ лувд ухъхъа

Доди ху ризин зохът аз малла

Зохъти еди въам тар кушхуна

Агъезди въам гуе лак хъефцт йа

Дундата питир сут въам курта

Богбуни чухътху ят въирд мазза

Шароби чуд йеданд въи галаба

Чуди аз акл въи бегуна

Хабар сут зибенти въам фрихъта

Саракийен саратъ сат въухъер

Чухътениде царанг судъч въев кор

Паценен чуд аз ху дод сангсор

Ризин сат дъевъин, пуц тижди ху дор

Йу хидир пуц хурд гури чуд тайер

Баъди ху чуд ситкати якхамвъор

Царангач сут кисмати богбун

Въи савъораянд рост сут въи эълун

Ам сут йу ху мулканд ар Бадахшун

Кофартарини насли инсун

Ам нахтуйд йу аз дини мусулмун

Ху кудакен бахти чуд въерун

Хубатъ мудата навуди имун

Якбори назарта тар Хуйумам

Якбори хавъаста тар въи чумам

Мастам маш дивад ната салумам

Бефоидаятъ въам рузта хъумам

Хубатъ ху зиндаги въерунам

Въуз фамум ик маш фукатъ бирезам

Арчоям диност лапатъта зезам

Нов дъис буталец-та маш агъезам

Пас биди суд-аз шароб ху тезам

Мам дуньеянд, цунд фитнаят, цунд сир

Цундхойен цунд корти сат мохир

Цунд Мачнун вудат цунд вуд Тохир

Цундоям, ятху саттам шоир

Мам дуньеянд ачатъ окибат нист

Аммо мам му суганд ят мам охир.